يظالمني ظلم مامر على الناستره ظلمك عبر وتعده الحدود
أحب أسمع أخبارك وأتصل بيك
وجهازك مثل كلبك دوم مسدود
شربني غرامك كاس الهموم
وتجرعته غصب وعليك محسود
وذليت بودادك ذلة أيتام
عكب العز هذاك وذاك السعود
حكك ماشفت كسرات الأيام
ولا دمعك نزل من عدهن جبود
طغيت ومثل طغيانك ولا صار
تريد الخلك تعبد وأنت معبود
دخلي الله بعيونك بسك ذنوب
مو باجر تموت وياكلك دود
ودعتك حلالي وأمنت بيك
شعجب ترضى الحلال يصير فرهود
من يمته الخيانه تصير الك ثوب
وعايل صبحت مو جنت محمود
أنا أدريبك حنين وزامطت بيك
ياحيف العواذل كادتك كود
صدك منك تصح كل هاي الأفعال
وتزيح المستحه بعملاتك السود
وصدك يتجاسر الورجين عالذيب
وبليل الحماده يكاون بزود
ضيعت العرف وياي هينوب
ولا جنك لكطنه وصيد مصيود
شريت العشك مني وبعته للغير
عليك شفافك ونظراتك شهود
كريم الله ولك تتلاكه الوجوه
وحشمك عالبجه وحفرات الخدود
وحشمك على سنيني الضاعن وياك
وصرت بين الربع مذموم منكود
------------
للشاعر عبد الحسين الفراتي
