ابو ذيات

ما من طب يداوي الجرح طب طب
ولا واحد علينه بلطف طب طب
كضينه العمر حرب بحرب طب طب
لعابة طفل عدنه البندقيه


كلبي بالمهد والحزن طبه
ويجرحي الضايع اعله دواي طبه
الخلك جكجك تطيح او انه طبه
اطيح ومامش اسم الله عليه


الوكت بوزار حزنه وزراني
ولا صاحب سندني وزراني
عدوي بعيد ينبح وزراني
صديجي وطبعن انيابه عليه


بجيت عيوني عالراحو وهدبي
واعرفه كليبي مايهده وهدبيه
الحسبته سلاح بالشدة وهدبيه
هدو بيه عدواني عليه